每年維園年宵，最近天后入口嘅1號同2號靚位都係支聯會盤踞地，但舊年俾神秘人狙擊，搞到支聯會只投到1號攤位，仲要成九萬幾蚊，今年佢哋終於「收復失地」。噚日支聯會副主席蔡耀昌分別用30,500蚊同24,200蚊成功搶番地頭，查實今次個價係歷嚟第二高，但保住地盤大過天，難怪主持人嗌完成交，蔡耀昌開心到成個彈起身振臂高呼，自覺幸不辱命。
年年維園年宵攤位，都有好多內地朋友嚟買六四書籍，但過關俾人捉到就大件事，所以支聯會亦諗計，今年攤檔主打六四USB（手指），裏面儲存6.4GB有關六四嘅電影同歷史資料，唔只過關冇咁危險，返到屋企傳畀朋友睇都方便啲啦！民主女神像同六四Tee繼續有得賣，之前為六四紀念館籌款而錄製嘅CD《民主會戰勝歸來》，少量存貨都會帶埋去年宵，目標係籌逾100萬。
學生做義工偷師
除咗政黨搶灘，年年都有唔少學生搞年宵攤位賺經驗，但投資額咁大，壓力都幾大，蘇浙公學老師就有妙計幫同學。上年幫NUTS慈善籃球隊睇檔，今年再有60位商科同學同年宵常客「砵仔王」合作，主要貢獻勞力，順便偷師。兩年都有份參與嘅中四學生翟傲邦話，投標嗰時有老闆傍住，教佢哋分析對手諗乜同叫價戰略，如果自己做實搵唔到方向。佢哋最後不負眾望，以88,300蚊搶到60號靚位。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange