做過港交所（388）同香港馬會主席嘅夏佳理，出名愛馬，除咗香港外，佢喺歐洲都有養馬，名下英國愛駒「紅色禮物」噚日又遠征澳洲，喺3,200米一級賽墨爾本盃跑得第二，又做二奶，之但係獎金有660萬港元，比香港一場一班賽冠軍仲要多㗎。
袋660萬獎金和味
點解話「紅色禮物」又做二奶呢？事關呢隻馬前年喺呢場澳洲大賽跑第二，今年捲土重來，一心想贏出，直路喺騎師巫斯義策騎下一度領頭，以為sure win，點知尾段俾「繁花似錦」超前，再次做二奶。
雖然「紅色禮物」做阿二，但夏佳理贏得嘅獎金都好和味，呢場墨爾本盃話晒係澳洲最盛大賽事，總獎金600萬澳元，約4,400萬港元，「紅色禮物」跑第二獎金都有90萬澳元，約660萬港元，比香港一場一班賽冠軍仲要多，相信夏佳理都好滿意咯。
夏佳理上月底應承老友「小小超」李澤楷出山，擔任富衛主席，幫小小超打理呢間新買番來冇耐嘅保險公司，可能啱啱上任，要花時間了解保險業，夏佳理似乎冇去現場替「紅色禮物」打氣，噚日只係見到佢太太夏安麗喺沙圈出現。
李華華
mailto:[email protected]
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24