光纖之父高錕噚日80大壽，中大好有心，為呢位前任校長開咗個簡單而隆重嘅八秩壽辰party，30幾位好友和舊同事齊唱生日歌慶祝，又送上有諾貝爾獎圖案嘅生日蛋糕賀壽。高教授冇見一排，精神唔錯，眼仔睩睩，不時手指指，人人爭住同佢影相都來者不拒。
中大校長沈祖堯都有出席，讚揚高教授為中大貢獻良多，教育無數莘莘學子，佢嘅光纖發明更改變世界。自從高教授患上腦退化症，妻子黃美芸一直照顧有加，能夠陪伴丈夫度過80壽辰，都戥佢開心，「八十大壽都係好難得，多謝大家有心」，跟舊老友聚頭，一切盡在不言中。八方都喺度祝高教授福如東海，萬壽無疆。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange