689死都唔肯清楚解釋免費電視發牌嘅決定，次次都話保密制大晒。究竟點解佢唔肯講呢？我求大俠喺星期日嘅英超得到啟示，好似熱刺領隊波亞斯，佢嘅門將洛里斯喺周日對愛華頓場波入面，一度休克，但波帥竟然冇換人！佢賽後解釋，見到洛里斯醒番後充滿自信，所以就畀佢繼續踢。
新魔獸膝頭撞人頭
踢到77分鐘，愛華頓前鋒盧卡古同洛里斯爭波，後者快一步接實皮球；但盧卡古就收唔切掣，撞咗埋去洛里斯度，個膝頭仲撼中埋佢個頭。盧卡古俾人叫得做「新魔獸」，當然力量驚人，即時搞到洛里斯休克。熱刺隊醫即刻入場診治，而洛里斯亦慢慢醒番，但呢位法國門將仲係滿天星斗！隊醫覺得大鑊，提議馬上換人。不過，波亞斯嘅眼力勁過華陀，一睇洛里斯個樣，就認為佢一定冇事，俾佢繼續踢。
波帥理直氣壯咁話：「醫療團隊建議我換人，話洛里斯唔知自己喺邊，唔記得發生過碰撞，但佢有決心，好想繼續比賽！憑我嘅足球知識，當一個球員咁有自信，代表佢有能力比賽，所以我取消咗換人。」雖然波亞斯講到係洛里斯自己要求留喺場上，但作為主帥，應該以一個客觀嘅角度判斷球員係咪適合比賽，唔係話佢想踢就俾佢踢。
我求大俠對足球認識唔夠你波亞斯深，但總算有啲常識！一個球員講唔出自己喺邊，但又話想繼續比賽，一聽都知佢唔多清醒。撞親個頭可大可小，好在洛里斯福大命大，𠵱家經檢查後證實冇事，但如果佢有咩冬瓜豆腐，你波亞斯點過得去！
話你知
國際足協有條例列明：「一旦球員出現腦震盪，必須要被換下場，並接受緊急的醫療治理。」
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24