以「阿一鮑魚」打響名堂嘅富臨飯店老闆楊貫一，81歲未言休，佢銅鑼灣間舖早前被業主狂加價而逼走，下月搬去信和廣場。信置（083）有呢位出名租客，當然要搵佢露兩手順便宣傳個場。
一哥大讚新舖樓面大過舊舖好多，萬幾呎都係一層過，客人唔使行上行落。問佢仲開唔開分店，佢好感慨咁話，唔係話開就開，唔係舖租貴咁簡單，而係𠵱家靚鮑魚越來越少，開咗舖，冇靚鮑魚畀人食點搞？
曾有朋友問佢喺邊度可以買到三頭鮑，佢都好無奈咁答：「你不如賣廣告徵鮑啦，睇吓邊個富豪肯割愛畀你好過」。佢就見過有富豪儲咗幾十罐靚鮑，嚇咗佢一大跳。
當年佢為咗得到靚鮑魚，甚至用15斤燕窩，跟朋友交換幾隻三頭鮑。佢憶述，食嗰陣嘅香味，真係隔住張枱都聞到，可惜𠵱家有錢都搵唔到喇。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange