聖誕節正日係12月25日,但香港人個聖誕節,明顯長達兩個月。只不過係11月初,商場已陸續掛上聖誕裝飾,同朋友Natelie傾開計,原來海港城萬聖節都未完,就已搶閘帶畀大家聖誕氣氛。
經各大商戶多年來洗腦,聽到聖誕鐘聲,消費意欲就會向上衝。九倉(004)相當明白「早買早享受」道理,早啲提你聖誕到要買嘢,將旺季提前,公司自然賺多咗。過多幾年,分分鐘掛完燈籠就會換聖誕樹。
三中全會本周末就揭幕,市場早就學九倉「早炒早享受」。市場一早預期,為加快城鎮化,阿爺會睇重鐵路改革,所以三大鐵路基建股早就炒高咗,不過中國最大的安全及緊急控制系統供應商中國自動化(569),就似乎係啱啱先起步。
中自化喺低位浮沉一排後,以一支大陽燭,配合大成交,完美突破1.7元阻力。集團半年盈利下跌27%,主要係受鐵路業務受鐵路部重組所影響,但已比上年下半年好,證明一早已見谷底,加上如果下半年鐵路業務進一步好轉,盈利有望再現增長。
比較同業,中國智能交通(1900)預測市盈率15.6倍,但中自化只係得7.2倍,又未免過份落後,所以中自化值得睇高一線。
Fifi
本欄逢周二、四刊出
足本收睇《亂噏24》x 鄭中基谷德昭;跟住有新紥師妹楊千嬅駕到!
周一至周五《亂噏24》約定你: http://bit.ly/appletalk24