話咁快季度業績又接近尾聲，全城關注嘅匯控（005）終於公佈成績表，好可惜表現差強人意，想衝返上90蚊都好難。
既然多個板塊都已經炒完，係時候留意落後股嘞。市場等緊星期六舉行嘅三中全會，雖然大部份傳出嘅政策，一早已經炒完，不過，有個行業就好似等緊機會爆上，呢個就係建材股！好似龍頭股安徽海螺（914）首三季多賺近37%，但都未能刺激股價突破橫行區。
中建材目標 美林睇12.9元
負債較重的中建材（3323）首三季少賺8%至33億人仔，表面上睇盈利倒退，股價就梗係無力衝上。不過，細心睇一睇，其實該公司中期盈利跌三成至13.5億人仔，即係單是第三季已賺近20億人仔，盈利表現已逐步轉好。
政策方面，近日國家主席習近平已經強調，「十二．五」規劃目標之一，是建設保障房3,600萬個單位，當中會重點發展公租房，加快建設廉租住房，反映水泥需求將會繼續增加。
再加上，第四季係內地傳統建築嘅旺季，基建及房地產項目要在年底前趕工逹標，有數據資料顯示，10月份內地多個地區的水泥價格，持續上升，相信11月份仲有加價的空間。
近日多間大行都出報告調建材股評級及目標價，德銀調升潤泥（1313）目標，大和調升中材（1893）評級。
中建材就獲美林睇中，將目標上調至12.9元，較該股昨收7.75元仲有大把水位！
瑪姬兒
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24