麥浚龍（Juno）首次執導嘅電影《殭屍》，片中角色好似錢小豪、鮑起靜同惠英紅，個個烏眉瞌睡苦瓜乾咁面，同以往盛極一時嘅殭屍片好唔同。坊間嘅評語都唔錯，套戲截至前日上映11日，已接近1,100萬票房，都咪話唔嘢少。Juno好開心話：「要恭喜及感謝嘅名單太長，係整個團隊嘅功勞。其實《殭屍》得到唔錯成績，代表香港電影可以容納、需要更多題材同演員選角。」
搜查苗族底蘊
好明顯，《殭屍》係向1985年劉觀偉執導嘅《殭屍先生》致敬，對於殭屍片死灰復燃，原來劉導演亦籌備緊一套殭屍片，預計明年3、4月開拍，佢日前接受電話訪問時就話：「Juno都有同我提起佢套片，其實電影題材係一個循環，由85年拍殭屍片拍到90年，觀眾都睇厭，隔咁耐又拍番，自然又唔同。其實我𠵱家喺貴州，諗住搜集啲苗族少數民族資料，加落新片度。」佢仲話已經搵咗徐克做監製，暫定戲名係《吸血女王》：「老徐𠵱家執緊個古仔，個名都會改。預計會有外國同港、台藝人參加。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！