互聯網概念當炒，但凡與之沾上邊，投資者都會「未出發先興奮」。上兩個星期內地百貨公司銀泰（1833）宣佈同阿里巴巴旗下嘅天貓結盟，喺11月11日光棍節參加促銷，提供6萬種商品，同時推出「線上線下同價」。即同一件貨品，網上賣嘅價錢，會同銀泰全國32間百貨店賣嘅價錢一致。實質有乜得益仲未知，但銀泰股價即日就勁升9%，認真無厘頭。
嚿年阿里巴巴喺光棍節，單日銷售額就達191億元人仔，係同日百貨公司嘅N倍。聞說阿里巴巴今年嘅目標係300億元以內，傳統零售商肯定頭痕。所以與其話銀泰搵新商機，不如話佢其實係冇得揀，為咗避免生意流失，所以點都要喺網購上搞啲花臣，屬防守之舉。阿里巴巴嘅光棍節，減價幅度平均達2至5折，銀泰旗下嘅百貨公司要參與，一係半迫、半補貼租戶去提供優惠，一係就自己買斷貨品，承擔存貨風險。呢種實體店持續降價嘅趨勢，睇怕一開始咗就好難返轉頭，可以想像未來喺定價方面，銀泰同商戶之間嘅矛盾，怕且會更浮面。
線上線下同價，係希望可以將網上購物嘅人潮，轉介返落舖頭，做到cross-selling。但呢招猶如「七傷拳」，未做到成績，先要自傷三分，勝負難料。海迪相信銀泰今次真正做到線上、線下重疊的貨品，比重應該非常之少，公司都只係想試下劍，成績？有排都未見。
海迪
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24