【本報訊】城規會昨就中環海濱改劃為軍事用途讓公眾表達意見。惟城規會限制每人只可發言10分鐘，該會主席兼發展局常任秘書長周達明突中斷立法會議員陳家洛發言。陳更多次被「熄咪」。陳與部份與會人士離場抗議，並聲言保留法律追究權利。
周在會議開始前先講述聆訊有特別安排，包括每人只可發言10分鐘、口頭申述不能重複等，又史無前例安排職員為每位發言人計時。
發言時間未夠被中斷
陳家洛獲另一申述者授權，合共可發言20分鐘。他反對中環海濱改劃為軍事用途，但20分鐘未到，陳就被周中斷發言，周說：「唔好意思陳議員，你20分鐘時間就到，我想聽一聽你大概需要幾多時間，因為你都想申請延長時間㗎啦，咁我哋一陣稍後時間會處理。」
陳指未能估計自己仍需多少時間，但他已被多次熄咪阻止發言。他說：「我希望主席你尊重我。」但此話一出又被熄咪。周接着說﹕「我講咗係尊重你，所以我𠵱家當你係提出一個延長時間嘅申請。」但陳想再回應時再被熄咪：「你話聽，又熄咗我。」
保護海港協會前顧問徐嘉慎其後也加入爭論，批評周達明決定無法律根據，「咁有身份地位嘅議員，你能夠咁對待，本人亦都有身份地位，我坐喺呢度嘅時候（城規會），你哋仲未喺到，所以你咁做法，主席，我哋好大聲抗議，我哋係集體walk out。」
陳家洛批評，周達明終止其發言做法極暴力、暴戾，批評城規會聆聽市民意見的機會都被剝奪。他指被打斷發言，政府是無私顯見私，「我啱啱先講緊中英協議上面，講得好清楚軍事用地係可以作其他用途，點解政府會呃市民，點解梁振英要呃市民……佢憑乜法律講、憑乜理據講，唔可以畀政府蒙混過關」。
陳家洛被熄咪經過
9:45am
城規會主席周達明講述聆訊的特別安排，包括每人只可發言10分鐘。多名出席申述意見人士提出反對
10:20am
規劃署解釋改劃用途理據
10:40am
首個申述者為支持改劃軍事用地的中西區發展動力
10:45am
陳家洛開始發言，他獲另一名申述者授權共可發言20分鐘
11:04am
周達明終止陳家洛發言，更多次熄咪
11:10am
申述者集體離場抗議
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange