蘋果散戶指數上星期再次出現零入市意欲嘅驚嚇場面，根據往績，散戶離場往往預示大市仲有得去。其實大市𠵱家喺高位，點解散戶都係冇厘神氣呢？事關典型散戶都係主力炒中資股如內銀、內險、資源股居多，但唔好意思，今年炒呢啲股，真係塘水滾塘魚格，想跑贏大市都有難度。
指數唔上唔落，又係二三線股發圍嘅日子，資金搵嘢買，業績靚仔肯定獲優先考慮，好似彩星玩具（869）咁，盈喜後兩日狂升三成，但預測市盈率其實都仲係單位數，一於升到你唔信為止。噚日推介嘅包浩斯（483），亦屬同一例子，預測市盈率依然係單位數，噚日嗰棍應該只係熱身。
從圖表出發，見到隻傢俬股敏華控股（1999）橫行咗半個月，走勢似足未突破嘅包浩斯，噚日成交突然急增，配合下星期三放榜，相信好快會破位。敏華早喺10月中發盈喜，預期截至9月底止中期盈利，按年將升一倍，以去年同期賺2.2億銀計，今年中期將賺4.4億銀，下半年度乃傳統旺季，保守估計下半年盈利再升兩成，則全年可賺約10億銀，市盈率將降至12倍，以龍頭嚟講絕對唔貴，完全符合績優估值平嘅要求。敏華噚日收報13.62元，升1.8%，日線圖已走至三角形末端，買定等到業績，勝算甚高。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange