電視撈飯:《吾淑吾食》接棒收視升May姐節目播完繼續被插

電視撈飯:《吾淑吾食》接棒收視升
May姐節目播完繼續被插

之前俾人鬧爆成日哈哈哈同用雞汁嘅無綫飲食節目《May姐有請》雖然已經喺上個月27號播完晒,但依然都有是非。話說啱啱喺美國加州學烹飪嘅薛芷倫,噚日喺微博插May姐馮美基嘅節目,話用大量橄欖油落鑊高溫炒煮會致癌。

指橄欖油炒菜致癌

薛芷倫話:「上星期睇「哈姐有請」(《May姐有請》)教煮素菜意大利粉,竟然用大量橄欖油落鑊,在高溫下炒意大利粉、三椒和菇,就稱之為健康素菜意粉。我的天啊!要知道橄欖油絕對不可用作高溫炒餸,因為加熱後會引致氧化,在體內產生毒素和致癌物質!哈哈,唔講得笑㗎! 」
噚日打電話問番May姐,佢話:「橄欖油有啲可以煮餸,有啲唔可以,有啲用嚟撈沙律,唔可以high heat,我梗係用煮得嗰隻啦。」少年食神林澄光亦喺電話度話橄欖油炒餸菜冇問題:「橄欖油可以高溫煮食,每隻油都有唔同受熱油溫,只要睇清楚標籤小心揀清楚就冇問題。」不過最好喺節目中講清楚,唔怕觀眾唔識用錯嘛。
另外,黃淑儀(GiGi姐)主持嘅《吾淑吾食》前晚接《May姐》棒播出第一集,冇咗May姐哈哈哈笑聲同雞汁之後,冇收投訴之餘,收視即刻飆升,前晚平均收視有23點,觀眾人數148萬,比之前《May姐》升咗2點,多咗13萬觀眾,而節目冇刻意加插植入廣告,唔知無綫係咪怕再俾觀眾鬧爆而「輕手」咗呢?
版主:陳基征

鄺美雲(中)喺最後一集《May姐有請》親自示範用橄欖油煮意粉。
電視圖片

黃淑儀主持嘅《吾淑吾食》接May姐棒,收視即刻升兩點。電視圖片


逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com睇番足本網上版,除咗有專訪外,仲有好多時裝靚嘢睇!