天虹紡織（2678）由上年低位到家陣爆升咗6.8倍，股價touch the rainbow之際，魏橋紡織（2698）仲未上破上年5蚊嘅高位，超級大落後兼超級平靚正。
呢轉買魏橋升幅，博佢嘅升幅係天虹1/6，即係翻一番，都超級肥仔水。
魏橋係全國最大、亦都係全球最大棉紡織能力嘅紡織企業。加埋該集團又係阿爺重點扶持企業，優勢彈晒出嚟。
但作為行內龍頭企業之一，魏橋最新H股市值只係得20億銀，就算成家企業嘅總市值，都不過58.4億銀咁大把。
寶島同業遠東新世紀嘅市值高達457億港銀，係魏橋嘅7.8倍！魏橋市值係細路仔，同佢嘅龍頭地位，絕對係唔相稱。
純利爆升 估值平通街
魏橋今年上半年，純利一枝箭飆升咗近4倍，去到近2.7億人仔，已經好靚仔。踏入第三季，祖國出口紡織品較舊年同期增加12%，升到566億銀美金。紡織業上、下家齊齊好景，魏橋下半年都應該繼續靚仔。
估計魏橋今年純利，係咁意增長30%到6.3億人仔，預測PE跌到得7.4倍。
上邊寶島嘅遠東，今年預測PE係19倍，另外場內互太紡織（1382）14倍，至於天虹，亦挨近10倍，魏橋PE真係平到爆。
又魏橋最新NAV係16.4港銀，現價（4.9港銀）PB得0.29倍，天虹同互太紡織，PB挨近4倍，遠東同百宏（2299）1.4倍。魏橋PB又係最平。
呢轉買魏橋，今年PE目標睇齊同業平均嘅14倍PE，就要翻一番到約莫9.8港銀。到時，集團PB都不過0.59倍，仍然未有耐追到上邊同業，高到無倫嘅PB水位。
錢雋
細價股專家
本欄逢周二、五刊出
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24