前星期日蘋果記者冼麗婷寫敦煌，搵到大收藏家陳永杰講敦煌畫卷，上星期五出版之「亞洲週刊」封面故事講中國藝術品天價，也有一段訪問陳永杰講古董。左丁山認識陳兄近三十年，每月在飯局碰頭起碼一兩次，前星期佢請左丁山到山頂住所「略為參觀」，入到佢嘅畫齋，羅漢床、座椅、大書枱，全是明代木傢俬，起碼有五百年歷史，阿Frank叫左丁山坐一坐，就知道古人做傢俬之考究，坐五百年木椅？左丁山只敢輕輕一坐，就急忙起身，對木椅有所毀傷的話，如何賠償得起。
阿Frank收藏古董數十年，素來只買不賣，中日古董古物收藏無數，積積埋埋，都唔知市值多少，佢亦懶得去估計，佢話：「收藏古物，欣賞歷史藝術，係開心之事，如果計埋價錢，腦海就會被銀紙困擾，變成貿易買賣，乜嘢閒情雅緻都冇晒。」
中國一小撮人富起來之後，大量財富追逐有限之古董名畫。早年收藏家大發其財，為千年一見之盛況，只有極少數人如練松柏律師及陳永杰呢兩位朋友不為所動。因為古董文物藝術作品太值錢了，歪風隨之而起，十月二十八日之「國際紐約時報」就以大篇幅刊登一篇調查報導文章"Art and fraud in China"，講述內地之藝術品市場滿佈陷阱，冒牌的古董假畫四處都是，收藏家一不小心，容易受騙。報導舉出例子：二○一○年拍賣之齊白石1946年畫作，以六千五百四十萬美元賣出，但兩年之後，嗰幅畫仍然留在北京一個貨倉內，因為買家覺得幅畫是否真跡，仍有疑點，拒絕付款，另外在嘉德拍賣會（China Guardian Spring Auctions中國嘉德2011春季拍賣會，中國嘉德由趙紫陽女兒王雁南創辦，王雁南係現任中國嘉德董事總裁），以拍賣價排名之第二、第三、第四、第六及第九位，連埋第一之齊白石畫作，一共六幅畫之買家分別以不同理由拒絕付款，成為大笑話，國際專家認為中國內地之拍賣「不用認真看待」，INYT話中國名畫拍賣交易起碼有三分之一其實無真正錢銀過手，中國藝術市場已成為偽冒與貪腐賄賂溫床。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange