本來大家氣勢如虹，齊聲要求梁振英唔好再用「保密制」為名，推搪拖延揼波鐘交代為何否決王維基的申請，突然兩個唔爭氣嘅朋友，雙重標準，自己都玩埋保密制遊戲。
先有涂謹申為了和菲律賓商討人質事件的賠償問題，口口聲聲「保密協議不能透露內容」，再加一個湯家驊率大律師公會上京談「所有問題都有觸及」的會議，追問詳情，又是一句「保密協議唔講得」，梁振英當堂心都涼晒，唔該晒。
最慘「保密」通常都係被人搵笨。
菲律賓最擅長用「保密」玩香港人，先有梁振英會見阿基諾獻世時，香港老老實實保密無同傳媒交代，點知人地一個屈尾十自己發放座位不平等的照片再加特首話「放下人質事件」的金句，香港狼狽被動解畫。
呢個教訓在前，涂議員仲要見過鬼唔怕黑，又聽菲方話玩保密，轉頭人地又玩手段，話已經賠咗成千萬又屈香港貪心唔肯接受，無端被人過一戙，然後才氣急敗壞回應對方，所謂「保密制」名存實亡。
我真係唔明，難道「保密」係最好爭取權益嘅方法？事無不可對人言，特別係面對一個老奸巨滑嘅對手，「保密」只令港人無法得悉真相也無從支援協助。你保密，佢就係搵你笨搵足七次！
我更不明白，為何涂議員會認為，對口單位是市議員乃合適的等級，三權分立，議會不代表政府，要來何用？
一場尋求公義的行動，無端變成密室談判討價還價，我相信人質家屬不是從經濟立場提出賠償，而是要為了體現菲方的責任。你幾時看見慰安婦會和日本人保密協議談判？還不通天告上法庭？
保你大了，別扯淡甚麼保密了！