教育局局長吳克儉每隔一兩個星期就會「微服出巡」，去吓啲中小學，睇吓搞唔搞得掂。佢上個星期五去咗官校一哥皇仁書院，睇吓啲同學仔平時返學有乜玩。
學校神神秘秘，嗰日先通知同學仔。不過𠵱家啲九十後好機警㗎，即刻衝咗去圖書館印咗15個A4紙大字貼喺學校棟樑度，以「教育政策本土優先，唔得掂下台請早」呢個標語「迎接」唔得掂。皇仁仔果然勇猛，喺官校同教育局官員講「本土優先」。
但係，前晚有同學仔喺facebook吐苦水，15隻大字貼唔夠15分鐘就俾人搣走咗啦，同學踢爆係一個成日只坐喺校務處嘅職員，懶醒咁搣落嚟，仲要同老師報告。同學仔引述，個公務員職級嘅老師話，「唔使緊張，仲有半個鐘，快啲巡吓」，令到同學仔嘅抗議聲慘被滅聲。
同學仔就心灰灰話：「親眼目睹極速河蟹。皇仁，還是皇仁嗎？香港，還是香港嗎？」皇仁仔仲話，「紙張係邊班或邊個人貼上並不重要，但係我好肯定，呢十五個字，係不少同學嘅聲音」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange