飯後行往置地廣場，在中匯大厦遇到律師Y與議員S，於是一齊到太平洋咖啡坐低吹水，議員S下午要睇醫生，唔返立法會開會，自不然有的是時間，律師Y則素來交低晒啲工作俾其他律師處理，返唔返工都冇所謂。
左丁山醒起律師Y二十幾年前與黃永玉經常有往來，收藏了不少黃永玉畫作，碰啱近日有新聞講何俊仁得到朋友送贈黃永玉作品，為民主黨籌款，拍賣到三十萬元，由馬時亨投得，點知事後俾人話係「假畫」，冒牌貨嚟嘅，何俊仁於是道歉，退回三十萬俾馬時亨攞番幅畫，左丁山不知何俊仁的朋友是誰，以此問律師Y，議員S一聽見問題就㗎㗎聲笑，律師Y面色一沉：「你真唔知還是故意激我？報紙已經講咗咯噃。」左丁山知道勢色不對，即刻講：「真係唔知，可能睇漏咗新聞，真係至今不知送畫俾何俊仁嘅朋友係邊位，不過二十幾年前你同黃永玉時有往來，對黃永玉啲畫作有認識，先至咁樣問啫。」
律師Y冷笑一聲：「幅畫係我送俾阿仁嘅，阿仁唔想搞大件事，退番三十萬俾馬時亨，馬時亨俾三十萬係要買畫箒，可能並非有意思捐錢俾民主黨嘅，阿仁唔識貨，我咪攞番囉，鄭大班打電話嚟問及此事，我索性將幅畫送咗俾大班。」咦，大班咁咪執到寶，幅畫起碼值三十萬噃。
黃永玉避秦居港年代，作畫無數，有時興之所及就隨手送俾朋友，或由朋友買入，左丁山識嘅朋友之中，肥佬黎、蟻民兩位收藏黃永玉嘅畫作，大大小小，數目之多，一時難以統計，問肥佬黎可能佢自己亦冇一個確實數字。陸羽茶室夥計亦有一位得黃永玉歡心，贈送數幅畫作，最大嗰幅仲掛在其居所家中，我地笑佢收埋唔知幾多錢，佢又答得妙：「黎生先至多畫呀，我嗰三幾張難入方家法眼，拎出嚟賣可能有人唱我賣假貨！」檢驗黃永玉畫作真假並不困難，好多時黃大師有簽名，搵位筆迹專家核對下，就知道簽名是否偽冒，倘若因此而打起官司嚟，勝負好易分明。