要選今屆表現最跌watt嘅班霸，意甲球隊AC米蘭一定榜上有名，佢哋喺上周六嘅聯賽主場以0:2不敵費倫天拿後，11戰只得12分；而更有傳AC領導層已經對教練艾基利忍無可忍，打算提拔青年軍教頭兼AC傳奇前鋒恩沙基坐正，恩沙基更會向前隊友尼斯達招手，一於組美男教練團救AC。
負費倫0:2高層狂抦
AC米蘭今屆表現令擁躉失望，而喺上周六迎戰費倫嘅聯賽更淨輸0:2。賽後，教練艾基利話：「呢個絕對係我喺AC米蘭3年半以嚟最差嘅時刻，我哋一定要想盡辦法快啲拯救球隊嘅頹勢。」不過，喺艾基利未救到AC之前，佢可能已經率先掛冠。因為據報AC副主席加里安尼見到球隊輸0:2時，已經冇眼睇率先離場；而喺賽後，球會董事芭芭拉貝盧斯科尼仲走咗入更衣室同AC嘅職球員照肺，而且為咗喺周三嘅歐聯作客巴塞隆拿場波踢得好好睇睇，球隊仲要喺星期日即刻入營集訓㖭！當被問及自己仲獲唔獲球員支持時，艾基利就答得好玄：「球員支持嘅唔應該係我，佢哋應該互相扶持，度過呢個難關。」
恩沙基尼斯達拍住上
由季初開始，就一直傳AC想搵老臣子恩沙基代替艾基利。因為呢位AC傳奇前鋒，喺去季帶領AC嘅U17表現唔錯，今屆仲獲得提升成為AC青年軍教頭。不過，對於會唔會接艾基利嘅棒，40歲嘅恩沙基避而不答，佢話：「我𠵱家只想好好喺青年軍賽事吸收多啲經驗，等時機成熟時，自己會準備就緒。」
恩沙基雖然冇表態，但意國傳媒就話佢已有一套方案救AC，其中仲包括搵番當年同自己一齊喺AC馳騁沙場嘅尼斯達做副手。37歲嘅尼斯達於今季喺美職聯退休，佢亦揚言最想返AC執教。我求大俠雖然唔知恩沙基加尼斯達救唔救到AC米蘭，但好肯定嘅係AC如果由呢兩大型男掌帥，淨係台型都殺晒。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange