男兒淚，不輕彈，難怪商務及經濟發展局局長蘇錦樑，就算對港視員工前路幾咁憂心忡忡，都只可以哽咽而唔可以流馬尿。可惜吖，佢嘅好意未能打動直屬波士鬍鬚曾，事關喺蘇錦樑眼淚在心裏流後，喺一個早禱會上，鬍鬚曾稍嫌對方解畫火喉未到家，叫佢轉個彎再交代，據知谷唔出眼淚嘅蘇錦樑谷到一肚氣激動反擊，死人都唔肯再次勇敢站出來，仲話：「我可以做嘅都做晒嘞！」
早前有報道話，運輸及房屋局局長張炳良喺早禱會向狼英進諫不果，但原來鬍鬚曾都試過向蘇錦樑好言相勸但對方誓死不從，搞到財爺都要食白果。話說喺張炳良開腔前，鬍鬚曾已經喺蘇錦樑哽咽後嘅早禱會上話呀，蘇錦樑嘅解畫有改善空間，不如轉個彎再解釋吓，即時補鑊止血吖！
林鄭沉默剝花生
據知當日狼英唔在場，由林鄭主持會議。喺發牌問題上明哲保身，公開場合沉默是金嘅林鄭，席間冇乜嘢講，但都認同蘇局長應該再解釋。
吖，唔知係咪覺得身為直屬波士又唔幫拖，有事又阿支阿左，鬍鬚曾嘅「好言相勸」，蘇錦樑聽落覺得係風涼話居多。據聞佢聽完好激動，好似萬梓良上身咁話：「我可以做嘅已經做晒嘞！」不斷猛話冇嘢可以再講嘞，有乜嘢法庭解決啦。其他在席人士呢？八方相信都係剝花生居多。呢場電視發牌風波，真係場內、場外一樣好睇。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange