現年34歲嘅諸葛紫岐（Marie）懷孕8個月，噚日佢去到尖沙嘴出席b+ab活動，大會邀請佢幫布偶公仔着衫，司儀問佢揀裙仔定褲仔，Marie雖然揀咗褲仔不過就話：「唔關BB性別事，襯得靚啲咋。」追問腹中係仔定女？佢繼續賣關子話：「好快知，下次好冇？我知道㗎啦，不過等你哋估吓先。」咁滿唔滿意BB嘅性別？Marie話都係自己BB一定滿意。
「老公唔鍾意我出嚟」
老公薛嘉麟鍾意仔定女多啲？佢話：「男女都鍾意，老爺奶奶都係，有孫抱就開心。」Marie話奶奶畀咗好多意見佢，話32周之後已經健康，隨時生得，睇嚟薛老太真係好恨抱孫喎！Marie講明預咗開刀生仔，不過就未知幾時停工：「行唔到就會喺屋企，老公唔鍾意我出嚟，但係我覺得冇所謂，最緊要我開心。」有報道影到佢去睇豪宅，Marie坦言要為BB校網考慮，心水地段係港島區，雖然要搬離老爺奶奶，不過為咗BB都唔會介意。
撰文：馮仁昭
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange