「如果不力爭真普選，香港明天會點？」
我覺得，明天，香港會變成大陸眾多城市其中一個囉！我們不再為她驕傲，更加不會為自己是香港人驕傲。正如我們不會為上海，北京，成都驕傲一樣。儘管她們都非常繁華，而且女仔又靚又好身材。
由阿爺欽點的特首，處處聽命於阿爺，下下就住阿爺。大家同一個阿爺，同一間廠生產，結果當然就是香港與大陸各大城市一脈相承，倒模一樣。總之一樣。不可能不一樣。
獅子山當然屹立不倒。
慢慢倒下的，我猜首先會是我們的言論自由。
劉曉波《零八憲章》只是向共產黨建言，判坐十一年。我們在香港高喊打倒共產黨，結束一黨專政，乜事都冇。陳腔濫調，冇人睬你。
但慢慢呢？戴耀廷林行止練乙錚字字珠璣？結果封筆跟咗游清源而去。李慧玲鄭大班聲大夾準？結果去咗學唱歌。合唱東方紅囉，把聲咁好！蔡東豪劉細良《主場新聞》鼓吹佔中？結果去咗佔領秦城囉，大把位。
第二個慢慢倒下的是我們的法治精神。
大陸法院，立法機構，檢察官，公安，城管，個個幼承庭訓，每天唱着「中華民族到了最危險時候」，誓死效忠黨國。對黎民百姓天生應有的基本自由人權觀念，極之薄弱。所以你從來沒聽過有執法官員為黨國服務，卻因損害人民個人基本權利被檢控的。如果是為維穩，加官進爵㖭！家陣維穩費勁多啦！
反觀有真普選及法治的台灣。上周五的大新聞是檢察總長黃世銘，因監聽立法院院長王金平關說涉嫌妨礙司法公正一事，反被落案檢控違法向總統馬英九報告案情，觸犯偵查中案件不得向外公開條例（包括向總統報告也不可）。充份展示其法治精神。執法人員包括總長黃世銘，在為國家辦案期間，如果觸犯法律，一樣會被檢控。
如果沒有像台灣的真普選，特首繼續由阿爺欽點，香港執法人員亦會被洗腦，以為自己為港為黨為國為維穩，就可橫衝直撞，視人民的基本人權如無物。他們會好辛苦咁，徹夜不眠竊聽你電話，偷看你電郵，監控你臉書，𥄫實你WhatsApp同Line，收買你條女，跟蹤你條狗……
樹根跟住仲話，咁二十三條遲早都要過㗎啦！跟住警察半夜三更叫你起身屙尿。問你去台灣媾女，有冇見過施明德蔡英文蘇貞昌。問你去美國探親，有冇見過支持藏獨的李察基爾。問你去英國旅遊，有冇請千古罪人肥彭食蛋撻。
後記
吹水唔抹嘴，但吹吹吓都咪話，我真係驚㗎！
所以如果冇真普選，我支持佔領中環。
大佬，佔中犯法喎！
當法律與公義對立時，我選擇站在公義的一邊。
大佬，冇真普選真係咁緊要！
冇得選特首，等同冇得揀老婆。好冇尊嚴。
大佬，佔中膠做啦！
娶老婆夠冇包生仔啦！唔娶呀？
逢周一刊出
葉一堅
mailto:[email protected]
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24