【殭屍翻生之鬥志重燃】魑魅魍魎可怕，人的心魔更恐怖。麥浚龍（Juno）的電影《殭屍》想說的，就是「被遺忘的恐懼」——戲中小豪、阿友、梅姨與阿鳳，用盡方法證明自己的存在。換角度想，錢小豪、陳友、樓南光等優秀演員，隨着殭屍片沒落，何嘗不是被世人淡忘？這幫老戲骨今天聚首只有兩個使命：重振港片聲威，以及重燃內心的一團火。
撰文：文國駿
錢小豪重負包袱
角色：過氣明星小豪
林正英、許冠英及錢小豪這殭屍鐵三角，今日走剩小豪，令人欷歔。《殭屍》正是為小豪度身訂做，頗有半自傳色彩，片中他不再是20多年前的跳跳紮小子，而是性格陰沉雙目無神的潦倒中年漢，他緬懷昔日的風光歲月，身邊還保留着《殭屍先生》的戲服，令觀眾錯覺是他的自我投射，小豪說：「其實我冇成日懷念過去，我係鍾意向前望嘅人，不過導演想拍番殭屍呢樣嘢，講番興起同沒落，所以要我有嗰種失落情緒。」
小豪不諱言殭屍片式微，連帶工作量也減少，正好洽如戲中的氛圍：「開頭以為係自己際遇，後來發覺原來周遭環境都係咁。無可否認當時殭屍片拍到爛咗，時移世易香港都拍少咗片。」成也殭屍，敗也殭屍，小豪感受最深：「殭屍片令我紅咗，但都係包袱，之後兩、三年拍親都係呢種片，有時會諗，唔通除咗殭屍我冇第二種才華？之後索性唔拍，寧願走去台灣做反派拍電視劇。」《殭屍》一片帶挈一眾經典icon翻生，問小豪可有燃燒起鬥志？他笑說：「不嬲對自己都有信心，但呢部戲我希望大家認識錢小豪除咗動作戲外，都略有演技嘅！」
小豪昨日在將軍澳出席電影《長輩》欣賞會，講到電影《殭屍》票房口碑俱佳，小豪自言心情興奮：「好犀利，好開心，估唔到變成熱潮，有後生仔同我講，話想睇番我以前做嗰部《殭屍先生》，殭屍成為另一種文化。」不過他表示反應好也絕不拍續集。
對Juno評價：新人嚟講，佢係好高分，有好多人做咗好多年導演，到𠵱家想拍乜都摸不着天際。
陳友鳥倦知還
角色：隱世道士阿友
闊別大銀幕20年的陳友，在片中飾演隱世道士，踢拖短褲披件破道袍，一陣草根味撲鼻，演技不但沒有生疏，反而多了人生歷練。面前的他架着眼鏡，一副斯文生意人模樣，跟電影角色反差極大，他坦言做生意需理性思考，壓力大，今次回港拍戲可算是唞一口氣：「拍戲真係幾好玩㗎，乜嘢都唔使諗。」
陳友形容自己是鳥倦知還：「近20年都喺大陸做嘢，有時返香港同啲朋友聚會傾偈，會覺得自己好似一個大陸佬同佢哋講嘢咁。」原來陳友已有重歸本地影壇計劃：「我都寫緊啲劇本，想返嚟搞吓電影。」
對Juno評價：佢係好有要求，有好多諗法。佢擅長同演員溝通，令拍攝進度非常暢順。
樓南光無奈刪戲
角色：茶餐廳老闆
樓南光是縮骨怕死的代名詞，他在殭屍片的功勞不可抹煞。今次出山，原本與許冠英有對手戲，他飾演戲棚苦力，與飾演花旦的弟弟許冠英共同撐起戲棚，惜最終未能成事。他自爆曾因戲份少而與陳自強「嘈交」：「冇錯，之前Juno都同我講過係有條線畀我同許冠英，只係到最後逼於無奈有啲改動，係有啲可惜。之後我知自己戲份得咁少，真係同佢哋嘈過吓㗎，不過陳自強好有心咁同我解釋原因，講得我通，所以我拍！」
對Juno評價：以前殭屍片係少少驚，但適當時候會有笑點出嚟。今次一聽Juno講佢想點拍，都諗細路你真唔真呀，諗住咁拍？結果又畀佢掂咗！
鮑起靜神級壓力
角色：屋邨師奶梅姨
鮑姐從不拍鬼片，初時與電影公司接觸時表明拒拍，後來被Juno誠意打動：「Juno再約我出嚟，解釋番電影主題係講對親人嘅愛，俾佢講服咗！」鮑姐在戲中的演繹令人嘆為觀止，尤其一幕四分鐘一鏡直落，圍着丈夫吳耀漢的屍首自言自語又喊又笑，內心的忐忑、無助、悲慟、期盼完全演繹出來，絕對是影后級演出。談到該場演出，鮑姐謂：「拍嗰場戲其實好大壓力，壓力唔係源自演唔到，係因為拍嗰個鏡頭要好多配合，我記得嗰日全日只係拍嗰場，少少出錯就會令工作人員遲收工。」
對Juno評價：Juno喺片場冇脾氣，而且好有壓場感，完全唔似第一次做導演。而且佢同我講解劇本時聲細細，好溫柔，令你抗拒唔到。
惠英紅疑慮頓消
角色：精神病婦阿鳳
憑《心魔》勇奪影后的小紅姐，歇斯底里演繹駕輕就熟，片中的她本是幸福少妻，某日家中發生三屍命案，她被駭人畫面嚇到癲，帶着患病的兒子離開凶宅，那有家歸不得的心情儼如刻在面上。原來小紅姐起初對Juno亦抱懷疑：「最初係Willie（陳自強）打畀我，話佢契仔第一次做導演叫我幫吓手，我話冇問題，之後去到辦公室先知原來係Juno，我嗰時心入面都吓咗一聲，得唔得㗎？」但拍攝了兩天，這疑慮也一掃而空。
對Juno評價：佢好清楚自己要啲乜嘢、拍啲乜嘢，拍完頭兩日我已經對佢放心晒。
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24