不論甚麼行業，僱主們對人手不足、不斷流失，越來越少新人入行怕後繼無人等的問題，都一籌莫展只能乾着急。職場謬誤多不勝數，最大的「誤」莫過於有錢使得鬼推磨。
僱主認為只要肯畀錢，就可以收買員工包埋條命。員工認為只要人工夠高夠多，甚麼工作都一概冇問題。看近日請洗碗出到「天價」月薪兩萬，有自動洗碗碟機兼裝埋冷氣還是請不到人，究竟點解？做記者時間不穩定工時長人工又奀，做攝記的還要揹着幾十磅器材上山下海四圍跑，戰地動亂危險任務搵命博，為甚麼會有人前仆後繼趕去「賣命」？
有大學曾經做過一個實驗，講明是手板眼見完全毋須勞動的工作，請一班員工自訂身價，認為幾多錢足以令自己心甘命抵做，儘管放膽開口叫個令一切都值得的價。這份所有打工仔都夢寐以求的「筍工」，當然大把人爭先恐後打崩頭想做。被選中的執到寶歡天喜地開心如中六合彩般上班去。每位員工被分派到獨立房單獨工作，工作簡單到幼稚園學生都識做，就是每日在座位中不停拉手掣壓瓶蓋。
如此Easy Job大家說是不是應該個個做到不願走？要是有機會做的話你認為最長可以做幾耐？大家試猜猜實驗結果，最長的一位做了多長日子？你的答案可會是一輩子？
結果沒有一個做得長過一個禮拜，第一日經已頂唔順走人。證明人工多寡與滿足感對工作的重要性及影響，要是工作全無意義價值樂趣可言的話，幾多錢都無法令員工投入工作，注定很快流失。
須尋找滿足感樂趣
即使是我這種以自由身接Job，收入以每個項目作計算，我人一個時間係得咁多，是否只須向錢看價高者得？客戶要是只識看價錢而不是看到我的價值，重金禮聘請我來只求做個樣撐場面，寫份迎合老闆心意的報告，毋須水晶球我都知肯定做不出任何成績。這種Job我接來賺的錢不夠賠我輸了自己，一旦妥協兹事體大影響深遠！人可以窮、志絕不能窮，錢沒有了可以再搵，貪圖安逸被錢麻木蒙蔽，失去了鬥志、熱誠、衝勁，還有目標信念和辛苦建立得來的聲譽，得不償失！力爭上游很艱辛，沉淪完全不費力，話咁快玩完！
工作的價值除了必須展示，還要不斷創造創新，老闆如是，員工如是，甚麼崗位角色，包括如夫妻父母子女亦如是，要懂得欣賞所作出的大小貢獻及價值，彼此關係才可維持維繫，當中一切豈簡單一個錢字能比？
本周Son姐醒你：「挾太山以超北海，語人曰：『我不能』，是誠不能也；為長者折枝，語人曰：「我不能」，是不為也，非不能也。」
Son姐
「Son姐」 Alison張慧敏，以獵頭人身份縱橫職場幾十年，有智慧冇美貌有份量冇身材，人稱「魔鬼教練」！
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24