02年4月，黎瑞恩（小恩子）於首個個人演唱會中宣佈退出樂壇，此後她過着相夫教子生活。而在今個月，黎瑞恩為慈善復出舉行個唱，並謂：「我覺得自己好沙膽！憑乜嘢覺得開個唱會有人去買飛？」以為她會因此挑起歌癮而復出！可惜，黎瑞恩表明無意再返樂壇，更指稍後會跟到外地升學的子女一同到當地生活，所以這次亦很大機會是她的復出暨告別個唱。
撰文：譚倩宜
退出樂壇多年，黎瑞恩表示有不少人曾接洽她，希望為自己舉行個唱出發燒碟，但她均一一婉拒，相隔11年，令她答應舉行個唱的原因，全都因為慈善，小恩子日前接受專訪說：「本來只係做一場幫香港聾人協會籌募兒童教育中心興建嘅費用，後來中秋節前，陳德森傳短訊畀我，問我買月餅幫啲公公婆婆，講講吓先知佢哋籌緊資金喺油麻地開間為老人家贈醫施藥嘅舖頭，當時我就諗不如一場捐一間機構，所以就加多咗場。」
陪仔女外國升學
退出多年，突然要重回既熟悉又陌生的舞台舉行演唱會，小恩子形容這是個大膽的決定，她說：「我覺得自己好沙膽，因為我唔係仲做緊呢行，憑乜嘢覺得你開個唱會有人去買飛？應承完之後我都有反問自己，點解會有呢個決定！」為了個唱，要開始節食減肥、練歌排舞、宣傳做訪問，小恩子笑指以上種種均令她叫苦連天：「做演唱會唔辛苦，仲好過癮㖭，只係佢附帶嘅嘢辛苦，一日跑四個訪問，又要換衫又要做呢樣做嗰樣，我都唔明自己以前點解會捱到！𠵱家先發現做藝人原來好鬼辛苦，所以仲話再加場？真係唔好搞。」
為了個唱，小恩子少了跟子女相處的時間，問到兩名小朋友可有投訴？她說：「好在屋企人都好體諒，加上係為慈善，全家都好支持。係有時個女會問『媽咪你幾時返嚟，點解練歌練咁耐』，所以𠵱家都會留返星期六、日陪佢哋，平時就會每日最少三、四個電話。」小恩子表示子女均長大了，故稍後會安排他們到外國升學：「到時我會陪埋佢哋過去，人在他鄉，有病痛嗰陣冇個親人喺身邊係好慘嘅。」
自爆拍劇鬧導演
早前曾志偉四出碌人情卡搵老友返無綫拍攝，問到小恩子可有獲邀？她竟說：「冇搵過，不過應該都唔敢搵我，以前我拍劇曾經鬧過導演，當時因為自己新，唔識乜嘢位食光，而且成日NG，搞到導演開咪問我識唔識做戲，當時我即刻駁佢『唔識噃，我淨係識唱歌！』之後就冇人再搵過我拍嘢。」
訪問當日，筆者跟小恩子助手在討論美圖秀秀的偉大時，小恩子搭嘴說：「雖然𠵱家好多人都有執相，但我張海報真係冇乜執過㗎！」
至於提到其個唱海報被指似謝安琪，小恩子即說：「我就梗係覺得佢靚啲啦，佢又後生啲，其實自己唔覺得似。」
場地提供：鉄板燒海賀
髮型：Taylor Wan of Hair Corner
化妝：Meegan Seak of Bridal Corner
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24