【隔牆對論】
免費電視發牌風波不息，特首梁振英無視12萬人上街的怨憤，堅拒交代香港電視死因。港視工會及員工在大遊行後，留守政總七天，最後一夜的集會，有逾10萬市民支持，陪伴港視員工追夢，不過集會似在收看港視的節目巡禮，少談發牌的不公義問題，有指集會流於娛樂化。
曾在政總公民廣場參與多次集會的保衛香港自由聯盟韓連山指，港視工會取態似在「去政治化」，憂慮「歡樂今宵式」集會令運動慢慢凋謝；港視職工會理事長楊志豪自認是社運新鮮人，正因沒有社運經驗，新創意或令公民覺醒遍地開花，從未想過要令集會「去政治化」或「娛樂化」。
記者：雷子樂 鄭啟源
記：《蘋果》記者
韓：台下參與者、保衛香港自由聯盟韓連山
梁振英無視12萬人上街的怨憤，但上月底一連七晚的政總留守集會，港視員工只着眼於向市民分享他們的「電視夢」。10月25日晚的大型集會，花近九成時間尋夢、播片花。台下十萬群眾，似出席港視節目巡禮，多過向梁振英政府抗議。
記：你連日來也有參與港視的集會，工會有沒有「去政治化」的傾向？如是，又有何不可？
韓：有。香港電視員工比較唔想牽涉太多政治。第一日（10月20日12萬人上街）已經話，所有政黨嘅旗幟、橫幅，都唔好掛。頭幾晚留守，好多議員、團體有嚟，但冇獲邀上台講嘢。有一晚（10月24日）集會主題本來叫「夢想、正義」，後來將正義兩個字都刪除咗，改咗做乜嘢「逐夢」呀，將所有政治敏感嘅字都刪咗佢喎。最後留守嗰晚，做《半澤直樹》、搵咗Kashy Keegan唱This is our dream，你睇到佢哋傾向，係盡量避開政治。
記：只談夢想，避談電視霸權、政策不公義，是否脫離群眾？
韓：我好尊重港視員工嘅決定，但如果佢哋能夠將整個運動，帶向一個為香港人尋求公義嘅方向，呢個運動個成功機會會大嘅。𠵱家留守嘅十位員工，唔反對政黨加入，冇咁政治恐懼，都有提及公義好重要。佢哋真係跳出咗為發牌、為死因不明嘅框框，而真係去為整個大局，為公義，為香港人應得嘅程序公義去發聲，係一個突破。
記：大約從反國教運動開始，大家愛強調運動的「純潔性」，今次也有這傾向，這是否一種「潔癖」？
韓：反國教爭取撤回課程指引係一個目標，仲有個大議題係反對洗腦教育，唔好禍害下一代。呢個訊息好清楚。今次個訊息係較單一，如果港視員工只係要發牌，要死得明白，佢哋冇將個大議題，有關程序公義、有關香港人應得、關於電視施政公義凸顯出嚟。如果只係發牌、發牌、發牌，冇去追求更高層次嘅程序公義呢，個運動就會慢慢凋謝。
記：
但DBC事件，也是站在開放大氣電波的「大議題」去呼召抗爭吧。那場運動又為何會無疾而終？
韓：DBC反對滅聲，但到最後喺政總聚會，都係歡樂今宵形式，冇再呼喚群眾留守爭取開放大氣電波。港視員工，正正係重蹈DBC覆轍。當時我哋都批評大班，你搞到歡樂今宵咁，邊度有人嚟呀？
記：那今次運動，有沒有歡樂今宵化？
韓：完全有。佢整個鋪排，係播一啲劇集、唱歌、表演，讓群眾睇到一場好好睇嘅表演，而唔記得咗最初要爭取嘅係乜嘢。每晚萬多人嚟，你唔趁呢個機會呼籲市民留守，為公義而戰呢，就係注定失敗。有評論話根本成個運動主導，喺王維基手上，佢完全知道應該點同政府去deal，應該點同政府去得到做生意嘅機會。如果王維基有呢個方針，呢幾晚嘅歡樂今宵係好自然嘅。
記：若只講爭取發牌，整場運動可不至失控，港視老闆仍有空間跟政府談判，這會否也是一種策略？
韓：詭譎地方就係你點發放訊息，如果你發放畀群眾訊息係政治潔癖，唔敢進一步挑戰政府、挑戰梁振英嘅話呢，群眾肯嚟參與嘅動力會小咗。我支持港視員工，支持佢哋有飯開，有好嘅劇集睇。但呢啲比較狹窄嘅訴求，唔可能呼召到大部份香港人去參與。
記：但師奶向來不關心公義問題吧。
韓：反國教當初都一樣，都係辣着咗一班唔會出嚟嘅人，只係因為：你唔好搞我個仔！今次主婦跑出嚟，要睇好劇集，都係同一心態。問題係反國教，你唔好搞我個仔之餘，嗰班運動領導者，係知道需要去挑戰政府施政。今次師奶跑出來要睇劇集，但冇領導人企出嚟提醒佢哋，唔係淨係睇劇集咁簡單，係公義問題、香港政府施政霸道問題。
記：關心電視發牌的工會、政黨、社運人士，下一步，何去何從？
韓：11月6日係另一個重要契機，唔止係發牌，仲有行會黑箱作業、是否權力過大？要去挑戰行會，甚至要求個「一男子」下台。我覺得工會也好，政黨也好，可能佢哋都畀呢場抗爭一開始嘅去政治化而唔敢積極介入。政黨怕人話抽水而唔跑出來，係更加不負責任。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange