【隔牆對論】
記：《蘋果》記者
楊：香港電視職工會理事長楊志豪
記：工會留守公民廣場抗爭的七天，是否刻意有「去政治化」的傾向？
楊：好老實講，我哋全部都係一班好努力做創意工業、專注拍攝工作嘅人，從冇諗過搞社會運動，今次搞運動可以話冇策略。留守嗰個星期，我哋嘗試諗過好多批評制度唔公義嘅嘢，好似套港版《半澤直樹》。今次事件並非一間公司、一個工會嘅事，明顯係一個漩渦、一場風暴，令全部人都肯去行出嚟撐，我哋冇刻意「去政治化」。
記：連日集會主題似乎較多時間談夢想，少談電視霸權、政策不公義，會否脫離群眾期望？
楊：創意工業講求夢想同創意，如果唔去發夢，好難會有新創意畀到市民睇。電視霸權係嚟自冇競爭，我哋冇需要去攻擊某電視台，今次重點係點解政府唔畀多啲空間，畀機會個行業發展好啲。政府發牌話冇上限，但審批就「三揀二」，連政府網頁講發牌冇上限嘅75個字，都可以離奇消失，前日又悄悄重現。有人直頭話我哋政治「潔癖」，但咁多日入面我哋都有諷刺社會現象，同講今次發牌事件點樣唔公平，畀公眾知道我哋要討回公道。有夢先會有創新，我哋呢班冇社會運動經驗嘅人，好自然地諗到用呢種手法帶出一啲訊息。
記：好多市民都將今次事件與去年反國教比較，大家都強調運動的「純潔性」，今次是否也有這傾向？
楊：唔希望同以往嘅社會運動比較，每次事件的現象同風氣都有唔同。今次事件關乎到社會係咪容許行會成員做咗政策決定之後，完全唔使向公眾交代原因。誇張啲講，係咪第時通過「二十三條」都唔使話你知點解通過，幾多萬人上街都唔會理你，有乜嘢就法庭見。呢個係好差好差好差嘅社會現象。
記：10月24日集會主題本來叫「夢想、正義」，最後改咗做「逐夢、續夢」，是否刻意避開政治敏感字眼？工會又是否認為現時採用的手法，可以獲得更多市民支持？
楊：其實當晚改主題名稱嘅原因，係星期五大集會主題決定叫「夢想，黑暗裏仍然鏗鏘」，唔想日日都提夢想。其實集會都只係喺前五小時，大家即場商討而成，當中好多細節都係不停傾、不停變。我哋冇諗過透過乜嘢手法贏得民心，市民眼睛都非常雪亮，呢種表達手法，事實上都有好多市民支持。
記：DBC事件性質與港視發牌事件相似，都以開放大氣電波的議題去呼召抗爭，但那場運動最終無疾而終，有人歸咎是集會太娛樂化，會否擔心這次重蹈覆轍？
楊：我哋唔係特登娛樂化，有人甚至覺得我哋「悲情化」，呢幾日都係同事心聲分享，每晚都由同事分享感受，件事一啲都唔娛樂。當然我哋都想分享過去嘅製作，去討論係咪真係唔值得獲發免費電視牌，係咪我哋冇心去做呢樣嘢。上次事件，都可能牽涉公司內部或股東糾紛，但今次港視不獲發牌，好純粹係行會同特首政策決定問題，搞到咁不明不白。我哋目的唔係要將件事娛樂化，只係想市民睇多啲、知多啲。
記：今次工會發動的行動都比較溫和，會否考慮將行動升級，或邀請政黨及社運團體合作？
楊：今次事件唔單止影響香港，全球華人都關注事件，整件事不公義情況已經呼之欲出，但係用絕食及「較激」行動係咪真係有效果呢？工會討論緊好多方法，冇人夠膽講留守多百零二百日係咪真係有用，但我哋唔主張，要有人犧牲去達成目的。有人會比較以前社運嘅方法，但我哋係創意工業，點解要畀以前框框限制，一定會有新方法。不過我哋唔係一班好有組織嘅團體，都要一路一路去做。我哋從來冇刻意同政黨同社運界劃清界線。
記：如果11月6日動員市民包圍立法會都冇結果，下一步會點做？
楊：老實講我哋仲諗緊，現時正聯絡不同學院、文化界及創意工業界，歡迎多啲市民、團體同業界嚟支持。若引用特權法動議唔通過，我深信事件會引起更大民怨同民憤，到時已經唔需要團體或組織發起，因為人人都可以係leader，正如其中一晚集會主題「公民覺醒」已遍地開花。
mailto:[email protected]
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24