雙曼開季脫腳，今季英超爭標形勢登時禾雀亂飛，踢到今時今日你都唔敢講愛華頓同修咸頓完全冇機會，同「利迷」仙道彬傾開，當然各為其主，但至少有一個共識，就係看淡熱刺前景，其實都反映一個重心球員嘅重要。
熱刺呢十季八季都使唔少錢喺轉會市場度，11個正選都算得上粒粒皆星，但唔好講爭冠，連爭前4都成日虎頭蛇尾，上季有加里夫巴利爆晒珠都功虧一簣，個人認為同球隊始終冇一個頂級球星壓場有關，即係提起利物浦，你會諗起謝拉特，提起車路士，你會諗起林柏特或泰利。熱刺今季陣容亦夠強，但邊個先係領軍真正大佬？隊長戴臣，算罷啦，蘇爾達杜、荷西保連奴初嚟報到，安祖斯唐辛又新得滯。
正如曼聯，留與唔留朗尼，唔單止係踢法、表現問題，而係球隊真係要有一個球場上大佬；執筆之時，又睇到曼聯領隊莫耶斯陷於老將續約問題，傑斯、維迪、里奧等就快約滿，為慳錢當然續唔過，但如果再冇埋呢班老將，紅魔鬼肯定更為海鮮波，如果連朗尼都走埋，後果更加不堪設想。
而作為英格蘭第1前鋒，朗尼更加有留隊必要；雖然，過去朗尼私生活都有唔少醜聞，但球場上真係冇偷懶，中前場跑動一定係全隊數一數二多，你要佢墮後打進攻中場，佢雖然有不滿，但一樣會照做。而且朗尼04年已加盟曼聯，話咁快就10個年頭，就算比唔上傑斯等青訓兵，但肯定係曼聯icon之一，或者有人覺得，朗尼再續約，起碼周薪25萬鎊以上，對球隊財政長遠都有壓力。但換另一個角度睇，朗尼就快約滿，賣出咗收唔番好多轉會費，曼聯又要使多筆錢買前鋒，一來一回都要錢，似乎一動不如一靜更為明智。文：牽牛
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24