由台灣返港的「電眼美人」李美鳳,日前接受時裝美容雜誌《add》專訪,暢談幸福家庭生活。50歲的美鳳與夫婿已踏入17年的婚姻,她笑言結婚兩年已沒有浪漫:「有時我哋去睇戲見到情侶依偎喺一齊,又或者我去散步見到老夫老妻手拖手行過,我都會諗能夠咁甜蜜就好,我先生唔太喜歡戶外活動,比較文靜,唔似我周圍跑,行吓公園,但我又好明白,唔可以逼佢去做我鍾意嘅事。」
想拍處境劇
李美鳳自言覺得幸福感恩,平時忙於照顧一對14歲的龍鳳子女,不過她管教子女絕對不是虎媽:「我好民主,從來冇逼佢哋喺課外學啲乜嘢,全部都係小朋友開口要求學彈琴、學游水,我都冇所謂,我覺得小朋友享受先係重點,我着重學習過程多過結果。」她更表示一對子女踏入青春期,各有改變:「最明顯冇耐性,有時放學返屋企會黑口黑面,原來青春期荷爾蒙影響情緒,小朋友越大我越明白要當佢哋係朋友,弟弟較遲熟純品,姐姐比較獨立有主見,要調節溝通方法。」
此外,美鳳現在培養不少興趣如踏單車,學社交舞,但未有意見想復出拍戲:「會顛倒生活模式,反而胡思亂想過拍處境劇,一大班演員合作好好玩。」(詳細內容請參閱第27期《add》)
撰文:唐如
逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!