昨日提及的乾隆科技(1236)賣盤後狂炒第二日,累升四成,再追風險甚高,冇貨等等,有貨坐穩。另外,彩星玩具(869)終於破頂,原來是春江鴨炒盈喜。收市後,公司公佈首三季稅前賺3.7億銀,單計第三季賺1.74億,勁到無倫!即使第四季盈利持平,今年預測PE僅7倍,反映現價仍是大超值,衝向4蚊關不是夢。有報道指忍者龜卡通開始於央視播放,對玩具銷情肯定大有助益!
早排本報做過統計,近月追入破頂股的獲利機率達七成,其實從邏輯上分析不難理解。每隻股票總有一班內線人,消息最為靈通,無消息下大成交掃起咗,通常意味有好嘢跟尾,一係盈喜,一係做緊大刁,或者獲猛人增持,所以要睇圖果斷追入先搵到食。此外,破頂股樓上無蟹貨,沽壓肯定較細,自然易賺錢。
近期推介的TCL通訊(2618)、海信科龍(921)、石藥(1093)屢創新高,海豐國際(1308)亦超強勢,值得介紹。海豐主攻亞洲航運物流業務,勝在海陸運輸並駕齊驅,分別佔收入六成及四成,有利分散風險。經濟不景時,可利用較短程的陸上物流業務,抵銷海運收入下降的影響,故能於目前經濟狀況下乘風破浪,首三季純利增長21.5%至8,532.4萬美元,兼派特別息10港仙,今年預測PE僅約9倍,抵玩!以12倍PE為目標,睇4.1元。
魏力
http://www.facebook.com/2012jason
足本收睇《亂噏24》x 鄭中基谷德昭;跟住有新紥師妹楊千嬅駕到!
周一至周五《亂噏24》約定你: http://bit.ly/appletalk24