無綫每年都搵力捧嘅藝員拍月曆，明年嘅月曆噚日曝光，為配合明年世界盃，無綫落重本以運動為主題。1月孭重飛嘅係視后大熱鍾嘉欣，佢同黃宗澤（Bosco）、吳卓羲等人踩單車，幾乎個個女仔都着背心騷手臂，惟獨係暴肥嘅苟芸慧得個頭，手臂就冇影，唔通佢嘅身形連執相技術都搞唔掂？
唔少緋聞情侶亦有份影，不過多數都分開月份出現，好似楊怡同羅仲謙，分咗手嘅胡杏兒同Bosco咁，只得佘詩曼同鄭嘉穎齊齊喺5月現身。另外，有傳會離開無綫嘅林峯、陳豪同楊怡都有份，已離巢嘅謝天華仲有得同花旦徐子珊耍劍擊，無綫可能見將有新免費電視台競爭，先破例放天華一馬。
另外，噚日有報道指無綫因阻住陳豪同楊怡搵外快，所以決定跟劈炮唔做嘅經理人陳嘉莉向外闖，無綫惟有改捧嘉欣BB同馬國明。嘉欣BB噚日喺佐敦出席活動，講到有傳楊怡劈炮就笑笑口話：「我同楊怡係兩姊妹，噚日先講完電話，影響唔到我哋。」佢話唔會叫父母返港支持，因為爸爸之前發生意外冇咗半隻手指。另有指子珊爭大馬視后聲勢好啲，嘉欣BB就話：「冇所謂，我好鍾意全民投票！」
楊怡有意外闖
而楊怡同馬國明噚日喺伊利沙伯醫院宣傳無綫新劇《On Call 36小時II》，楊怡話未約滿無綫，不過有同公司傾，係咪續約換獎？佢話唔會，但就露口風有意外闖：「想多啲機會出外試吓唔同工作。」佢話如果簽經理人首選係無綫。馬明聽到就笑話：「唔係畀獎留佢（陳豪），一向係咁，唔通轉咗？」
版主：陳基征
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24