「最美麗港姐」朱玲玲酷愛影相，最近有份參加喺中央圖書館舉行嘅大型攝影展，攝影展前日開幕，只見朱玲玲跟師傅陳紹文到場，唔見佢老公「上海姑爺」羅康瑞嘅蹤影。謎底揭開，原來羅康瑞忙住做刁，佢噚日補飛，話一定會去捧老婆場，笑住話「唔通想死咩？」朱玲玲應該冧晒啦。
世界十傑及著名攝影家作品展前日開幕，展期至11月7號，展示來自全球多個地區320位攝影師，合共1,200多幅作品，朱玲玲有4幅作品展出，主題圍繞大自然，如紅葉、蝴蝶。現場見佢跟師傅周圍觀摩其他作品，又同朋友一齊影相，但唔見上海姑爺。
急補飛 「唔通想死咩」
咁啱上海姑爺旗下瑞房（272）噚日下晝召開記者會，為中國新天地引入新股東，被問到點解冇去捧老婆場，佢就笑笑口話「係呀，佢（朱玲玲）好忙，我呢排搞呢單嘢（引入新股東）又好忙，我哋兩個都好忙。」咁𠵱家落實單刁，會唔會抽時間去捧場唧？「梗係會啦，唔通想死咩！」，佢講嘅時候仲好似滿口蜜糖咁，甜到漏。
其實上海姑爺同朱玲玲周不時無意間晒恩愛。朱玲玲早排接受訪問就投訴老公，話佢哋去非洲旅行時，上海姑爺冇耐性陪佢影獅子，話隻隻獅子都一樣，不停催佢走，後來索性匿埋喺酒店睇文件。你話下我，我又話下你，呢啲咪係情趣囉。
李華華
mailto:[email protected]
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24