北大青鳥（8095）叫緊三瓣糊，隨便一瓣食糊，都造就爆升動力，如果三瓣都中晒，就真係不得了！
北大青鳥主打消防系統設備，今年上半年純利就爆升咗14倍去到1,376萬人仔，兼超過去年頭九個月純利1,309萬銀。
三大好消息惹憧憬
北大青鳥喺今年7至9月嘅全國房產建築施工及新施工面積，分別達14.7億平方米及4.9億平方米，按年增加11%及15%。
房產開發增加，大圍好景，對集團嘅消防設備有好大支持，嚟緊11號公佈嘅頭三季度業績，應該keep住靚仔。所以，第一瓣，有得博佳績。
又中國城市軌道（8240）10月頭一話轉主板，股價就升咗20%，脫離毫子股行列。另一間9月26號「一周兩件」寫過嘅華彩（1371，前創業板編號8161），炒轉主板，短短七個交易日升咗80%。
北大青鳥對上三年嘅純利，符合晒轉主板要求。加埋集團今年純利應該靚仔，所以，第二瓣，係博集團升格主板，股價炒升。
北大青鳥已經講明，考慮最快今年底，分拆旗下青鳥消防喺深圳上市。估計青鳥消防今年純利上到9,000萬人仔，又以分拆通函內提及隱含33倍PE上市做參考計數，北大青鳥可以額外增值14.5億港銀，即每股1.2港銀，係集團現價0.78港銀嘅1.5倍！
連埋呢壇製作，北大青鳥NAV上到2.3港銀，現價大幅折讓66%。第三瓣，係博北大青鳥超級大增值。
如果北大青鳥反映呢壇潛在增值，要見1.98港銀，即現價升多1.5倍，到時PB不過0.86倍，仲係平過同業過倍嘅PB水位。
錢雋
細價股專家
本欄逢周二、五刊出
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24