綿綿秋雨下，卡卡射入靚波，雖然幫唔到AC米蘭贏波，主場被拉素逼和1:1，但卡卡總算取得回歸AC後首個入波。佢望向走過嚟慶祝嘅隊友，思緒飄到遠方，同樣嘅球衣，但已人面全非。
10年前，咁啱又係10月，卡卡仲係個初出茅廬嘅年輕人，當佢喺米蘭打吡為AC首度建功時，嚟同佢慶祝嘅係恩沙基、卡富、施多夫同舒夫真高，位位都係縱橫球壇嘅名將，個個都走嚟讚佢叻仔，而企喺場邊拍爛手掌嘅係名帥安察洛堤，嗰陣AC贏國米3:1。
入世界波賽和拉素
十年人事幾番新，卡卡經歷過成與敗，鳥倦知還，而AC都由意甲班霸變成中游分子。喺周三對拉素嘅出場陣容入面，31歲嘅卡卡係AC正選入面第2年紀大嘅球員，僅次中堅薩卡度。卡卡呢次回歸，身份唔再係新人，而係以昔日球會英雄嘅身份，帶領紅黑軍團走出低谷。上周中對巴塞隆拿嘅歐聯，卡卡已經踢得好好，交出助攻，幫AC以1:1踢和巴塞。呢場意甲，佢終於入波，仲係喺禁區頂拉弓遠射，實在拍爛手掌。可惜AC守唔到尾，拉素靠施安尼追成1:1完場。
以身作則教化巴神
入完波後，卡卡見到助攻畀佢嘅巴洛迪利，都知道自己要承擔更多，「巴洛迪利對球隊好重要，我一嚟就同佢講，唔好同球證拗交，因為咁做會被趕出場。我叫佢專注比賽。」卡卡感嘆：「好多謝AC畀第2次機會我！我會盡力搵番狀態，然後踢巴西世盃。仲記得，我啱啱嚟AC嗰陣21歲，𠵱家已經31歲。對於其他年輕球員嚟講，我可以起到一種模範作用，所以我應該負起責任，毫不猶疑咁接受呢個擔子。」
我求大俠望望卡卡，再望望AC教練艾基利，都好感慨，有時真係唔明點解佢可以留低做教練。AC失分後，跌到第10位。艾基利話球隊今場踢得好，只係把握力差啲，先至贏唔到。另外，盛傳熱刺及阿仙奴對前效AC、現效哥連泰斯嘅柏圖甚有興趣，希望喺1月羅致呢個巴西前鋒。
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24