莫耶斯今夏留住朗尼，被視為曼聯最重要嘅收購，但留住朗尼係咪利多於弊？朗尼留隊嘅大前提係，莫耶斯要畀佢打中鋒，而莫帥亦都屈服，用陣容遷就朗尼，放棄上兩季曼聯踢開嘅4-2-3-1，改為傳統嘅4-4-2。
呢個改變成效係點？大家有眼睇，曼聯攻力大降！由於尹佩斯要同朗尼分享禁區，所以尹佬今季觸球機會大減，好似鬱住鬱住咁，發揮唔到佢嘅最大威力，而且相信大家都同意，尹佩斯喺密集區域嘅用波能力同埋把握力都比朗尼好。為了滿足朗尼打中鋒嘅慾望，而令到尹佩斯威力大減，咁係咪值得呢？
由於卡域克同費蘭尼跑動能力弱，好少上前助攻，所以喺中鋒同防中之間，出現咗大片真空，無曼聯球員負責。上季，費格遜就係叫朗尼墮後，專心連接中前場，造波畀尹佩斯，但今季朗尼以中鋒為正職，少咗返後，令到呢個地區冇人，亦令到曼聯中路進攻斷開兩截，只能倚靠兩翼發動攻勢。
此外，因為朗尼，香川真司冇得踢最擅長嘅進攻中場，由上周中歐聯對皇家蘇斯達嘅下半場得見，香川踢攻中真係好勁！如果沒有朗尼，曼聯可以踢番4-2-3-1，尹佩斯打前鋒，香川真司做攻中，相信效果會唔錯。曼聯𠵱家需要世界級嘅翼鋒同一名覆蓋範圍大嘅防中，反而前鋒夠晒人，朗尼嘅存在就好似雞肋。不破不立，若果莫耶斯想真真正正重建曼聯，踢走朗尼係一個大膽但合理嘅選擇。文：咖喱
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24