第一次，是偶然；第二次，有可疑；賣咗隻「金蛋」的意馬（585）和網龍（777）接連發通告，話進軍教育行業，Samantha諗：唔係啩！本港嗰間搞補習社的上市公司，股價一跌不回頭，真係有錢冇掟使？
賣完《喜羊羊與灰太狼》版權的意馬主席梁伯韜話，透過動漫跨越娛樂與教育業，單憑Samantha細個鍾意睇教育電視，多過聽Miss用音波功教書就知有得做！至於剛賣91無線的網龍與Foxteq和嘉御基金定立備忘錄搞網上教育，由Apps平台轉去教書要咁騎呢？
當同事X話，早排睇完一條YoutTube教游水的片段，三日之後就學𣸹，Samantha就明白到教育業仲未絕路，只是形式要變，家陣好多家長焗仔女一日上三四個興趣班，唔上網爭取時間上堂真係搞唔掂。
而且有報道指，過去10年，美國大學學費加價速度是CPI三倍，是醫保的兩倍，歸因行政團隊不斷壯大，極盡豪華的娛樂和生活設施，租金、幫手打掃、印notes、燈油火蠟樣樣都係錢，試想下，如果不同類課程化身為「淘寶」架上的產品，可以讓消費者隨時隨地網上學習，要學費減價指日可待。
Samantha
本欄逢周一、三、五刊出
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24