王維基失落免費電視牌固然不高興，但據聞取得牌照的有線及now亦不見得興奮。有政圈中人對季陶說，其實獲發牌的兩間收費電視台私下同樣「牙痛咁聲」，無端牽涉發牌風波之餘，更大有可能「有手尾跟」，遭議員、公眾抽秤他們不能搞好免費電視，隨時會「執條鞋帶累身家」。
該政圈中人指，有線及now當日入紙申請免費牌照，各有盤算：now想藉此爭取政府撥部份電視頻譜，成為真正的「無線電視」；有線希望政府可以早些發牌，毋須與無綫、亞視談倫敦奥運轉播權。
現在政府企硬只容新免費電視用機頂盒廣播，對now來說屬「食之無味、棄之可惜」的雞肋；對有線來說，則倫奥已過，這個免費牌可說作用不大，「要又唔係、唔要又唔係」。
另一與兩間機構高層相熟的商界人士笑言，兩機構高層私下均自嘲「今次真係多得佢（梁振英）唔少」，事關梁拿他們做「擋箭牌」，力指發兩牌一樣有競爭，兩間機構無端牽連政治爭議，心中早已不滿，而在梁此說下，料日後兩台啟播後，議員、公眾勢必「驗屍咁驗」他們的節目、甚至會有人「雞蛋裏挑骨頭」，力證兩台hea搞免費電視。若兩台要大搞免費電視，單是拍劇及全港大派機頂盒，未來兩三年「唔少得使十億八億」，但廣告收入未必可以填補，隨時得不償失。
季陶
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange