美國聯儲局周三議息，會後聲明炒冷飯，幾乎係9月18號果份嘅影印，未有為儲局何時退市帶來新啟示。
不過，儲局今次會後聲明唔算鴿，加上美元技術上早就醞釀反彈，所以美元噚日彈番啲，至於係唔係死貓彈，就要睇下個禮拜份非農業職位報告。
會議聲明，對經濟復蘇同就業市場嘅論述同上次雷同，重點差別得兩個，包括樓市復蘇動力近月放緩，其次就係剔除咗警告債息抽高阻礙經濟復蘇嘅字眼，呼應返美債孳息近月回落個因素。
值得注意嘅係，美國政府上月初局部停擺16日，部份公僕被逼放假，好多旅遊景點亦暫停開放，對今季經濟肯定不利。
市場原先估計，在經濟前景不明朗因素增加下，儲局聲明會暗示延後退市，但結果隻字不提，只係喺會後聲明第一段補了飛，話今次對經濟嘅評估建基於現有數據，即係未計及停擺之後嘅影響，講咗等如冇講。
不經不覺，美元單邊走弱已維持了兩個月，儲局今次開會前兩日，已經開始有淡友平倉，儲局會後聲明冇提押後退市，美元展開短線反彈，主要與倉位因素有關。
事實上，儲局9月爆冷唔退市，市場隨即認定最快年底至會收水，觸發美元淡倉激增，連同美國上月債務上限爭拗，炒儲局明年3月開始收水的預期不逕而走。
由於儲局今次未有關上12月收水嘅大門，呢個因素已足以觸發淡友迴避，只要有部份淡友平倉，已經足以推動美元出現小型反彈。
在各主要貨幣當中，歐元走勢較弱，兌美元噚日曾跌返去1.36邊，短期稍有見頂feel。事實上，歐元由兩個月前的1.31抽上1.37，升幅達4%以上，雖然歐洲央行理事暗示央行冇法子阻止歐元升值，但歐元近期幾次衝上1.38後都無以為繼，加埋噚日德國公佈9月零售銷售按年僅升0.2%，消費信心亦差過預期，所以跌得比較應，喺下周五美國非農業職位報告出爐前，歐元估計會係1.36至1.38美元上落。
退市還待耶倫上場
除咗儲局，呢兩日新西蘭同日本央行亦議息，雖然新西蘭央行重申明年可能加息，但補充指可能因應紐元高企可能而押後行動，所以本周唔上唔落，係83美仙爭持。
日本央行一如預期冇動作，但令人意外嘅係，今次未有上調經濟前景展望，令市場質疑安倍經濟學係咪得咁多料，美元兌日圓噚日高位見98.57，短期預料都係96至98徘徊居多。
雖然儲局今次議息冇新意，對是否於年底退市亦留有一手，但主席伯南克只剩低三個月任期，加上明年初國會又再出現債務上限危機，儲局等耶倫上場後才退市機會較高，美元短線走勢，主要還看數據。
奇兵
本欄逢周五刊登
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24