手機股TCL通訊（2618）第三季業績靚爆鏡，經過多日消化獲利盤後，噚日終於突破7蚊水平，再創逾兩年新高。於智能手機熱賣下，集團第三季勁賺2.3億元，扭虧為盈目標成功於九個月時間達到，第四季乃行業傳統旺季，假設第四季賺到3億元，則現價市盈率為25倍。如果以預期第四季盈利作基準，2014年預測市盈率將降至不足7倍，絕對係大平賣，所以有理由相信，嚟緊幾個月係TCL通訊爆炒嘅大時代。
事實上，唔少大行都估唔到TCL通訊Q3業績咁利害，re-rate報告亦紛紛湧至。其中摩通表示，原預期集團第四季業績先會turnaround，𠵱家提早翻身，就算近期累積龐大升幅，亦無阻其未來升勢。
摩通指TCL通訊推出4G手機，以及加強歐洲、中東及非洲市場分銷，將會成為上升嘅催化劑，更將其目標價大幅調高五成至8.2元，較昨日收市價7.05元，仍有16%潛在升幅。
睇圖表，TCL通訊由2011年至今，周線圖形成超級大圓底，一旦突破8元水平，10元肯定冇走雞，除非期間業績有走樣情況，否則中線以10元為目標，絕不過份。至於摩通嘅8.2元目標價，齋炒憧憬已經可以去到，相信只係升浪嘅中途站。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange