【金鐘】歐陽震華（Bobby）近年拍劇都係一部起兩部止，佢套無綫劇《情逆三世緣》早排播完，不過喺被喻為視帝視后前哨戰嘅「TVB馬來西亞星光薈萃頒獎典禮」中，Bobby連入圍都冇份，睇嚟今年無綫視帝都輪唔到佢。
其實Bobby唔熱衷爭名逐利，得閒同老婆傅潔嫻行街食飯嘆吓世界好過。前日Bobby同老婆帶埋位設計師，去到金鐘連卡佛睇家具，見佢不停同設計師密斟，又同老婆交談，其間有個男友人幫眼。經過大病之後嘅Bobby，口渴都係飲礦泉水，非常健康。
新居大裝修
睇咗半個鐘家具，佢哋又轉去睇燈同床，差唔多乜嘢都睇，設計師不停畀意見，前後逗留咗成個幾鐘，睇嚟Bobby屋企要大裝修。稍後佢哋去咗咖啡店繼續傾，設計師攞埋圖則同Bobby兩公婆慢慢傾，傾多半個鐘至離開。跟住Bobby兩公婆開車返舊山頂道舊居，唔知係咪渣甸山新居要大裝修，暫時要搬返舊居住呢？而Bobby透過助手話：「早排去咗內地拍劇，所以趁呢幾日同設計師去傾屋企裝修嘅嘢，裝修都差唔多完工。」
採訪、攝影：陳辰、吳耀輝
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24