十月是面試月，某名校面試小一仔，只講故事，問他們平日去街會做乜。咦，好簡單。這樣，老師怎麼揀學生？難道校長是特偵組，在反光鏡後一眼關七睇穿晒披着羊皮的老虎仔的真面目？噢，不，是虎媽才真。既然面試是一加一水平，講吓去公園野餐這種遠離佔中、囤地、喪權辱港的話題，假如母親是「我討厭政治」的女歌星的話，學校最like，一輪面試已經收硬。
所謂面試，九成是門面，校方左篩右篩針對的，是學生的父母。名校戰略，揀公僕最穩陣，職業特性習慣了服侍老闆，不會挑戰校長權威。以林鄭為人辦，忍辱負重，身邊冇肩膊挨，挨住滲水牆，一樣咁打得！不過，這些A貨林鄭的子女，冇乜機會跟阿媽去街，公園野餐？三歲後冇試過，而三歲前，都是跟菲傭姐姐去的。唔，答得好，這樣的孩子，沒可能去政總抗議，操行有保證。將來必定可以跟左報冠名的所謂新香港人，順利磨合。名校生的出路，從林鄭成功過渡到李慧琼，家長三揀二，排隊報名排七日都抵。