香港自去年特首選舉前，已全面刮起一陣左風，越吹越左。
今日不論HKTV發牌事件、無綫河蟹新聞、黨報日日炮轟中港矛盾，指點特區內部事務，又或者最新最荒謬最新鮮的，香港芭蕾舞團未得編舞者同意刪除文革一段，都係呢股左風嘅體現。究竟呢股左風來自邊一方，係本土左派、梁政府及其支持者，抑或係北方，至今令人摸不清。
維基慘案挑起民怨
左其實係當前大勢，以王維基慘案為例，由始而終都鎖定梁振英朝綱獨斷，包括王維基本人，而從建制派及行會人士表現，封殺港視不似是北京負責港澳事務官員定下的政策，咁究竟係邊一方人士向梁明示暗示祭出封殺令？相信來自左傾大局，好多人認為左風應與捧起梁做特首有關，但實情並非始於梁當選，佢不過係令情況更壞，唔係因為梁係狼，而係因為佢無能，無法去抗衡、拖延、弄虛作假、上有政策下有對策，來應付不符港情嘅指示。
正如在宣傳戰線上，內地對香港越來越「進取」，與內地整體輿論環境惡化同出一轍，包括嚴格控制網絡言論，整頓媒體，拘捕維權人士，利用中央電視台攻擊外資企業等，內地嚴寒將至，香港自難獨善其身。坊間一直有一種觀點，認為內地左風，是收權後再放權前奏，為咗「捉一盤大棋」，為咗進一步在經濟上開放，所以在政治上先收緊。猶如79年鄧小平推行四個現代化，改革開放前，就先鎮壓北京之春民主運動，封閉西單民主牆，拘捕魏京生、「李一哲」，四五民主運動告終。究竟今日是否在走當年鄧小平舊路，冇人摸得清，而我只會問：「今時今日，還可以用當年那一套手法嗎？」
就以香港為例，當前政局早在十幾年前，相信已嚇怕本地中產，紛紛準備移民。但九七後成長一代，冇受過渡期政治鬥爭所折騰，反而冇乜政治包袱，輕裝上路。
維基慘案即使王維基本人唔想將火燒向北京中央，但客觀形勢將不以人的主觀意志轉移，群眾動員超過預期，𠵱家暫撤，再來之勢只會更猛，梁振英可以扮唔知、唔處理，如此取態，等於撥火叫群眾參加明年七一佔中。
七一已十年，香港社會亦起變化，要強制將時鐘回撥，冇可能，三中全會後，會否有新變化，煞住特區左風，實在唔多樂觀！
添馬男
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24