論NBA喺香港受歡迎程度，比英超、西甲等足球主流聯賽，應該差唔多，但行經街頭，見到着英超、西甲等熱門球隊波衫球迷，遠比NBA嘅數目多。一來NBA球衣嘅雞翼袖設計，如果冇番咁上下身形，只可以講丟人現眼，而且香港經常又熱又濕，唔做好止汗防臭工程，真係成隻狐仙周街行咁。
上季勇士已經率先推出短袖波衫，評價各走極端。新季快艇已經率先喺季前賽試穿，基斯保羅都話唔係好慣；馬刺亦會推出迷彩版短袖波衫，向軍人致敬，下一季仲話推展到20支球隊㖭。小弟就未曾着過短袖波衫，未知着住短袖波衫打波有幾大影響，但如果款靚，買嚟行街睇戲食飯着，似乎比周街尹佩斯奧斯爾謝拉特，嚟得多啲新意。
NBA產品香港唔算普遍，另一個因素就係銷售問題，作為NBA官方產品生產商，三間真係要鬧吓，選擇少之餘，反應又慢，好似年幾前林瘋熱，三間遲遲都冇佢嘅紐約波衫返，要到林書豪轉到火箭先有得賣。就算新一季波衫，都係得拜恩、懷特侯活、杜蘭特幾個星。好彩坊間都有唔少水貨NBA波衫舖，好似「射緊五」；而網上團購都已經流行，早前NBA官網搞6折優惠，小弟都入返件網隊風褸，4百蚊唔使，抵到爛！
牽牛
《蘋果》球評家
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange