滿以為個市會好似狼英嘅民望咁繼續尋底之際，港股突然嚟個反高潮。尤其A股三點收市之後，恒指越升越有，埋單炒高457點，重上23300水平。
濠賭同科網股反彈乃意料中事，但一直落後大市嘅中資金融股竟齊齊起哄，更佔據成交頭幾位。其實近期港股升浪，一直由濠賭同科網帶動，如今中字頭蓄勢接力，港股又多了破位本錢。
值得留意嘅係，幾隻A股ETF如安碩A50（2823）、南方A50（2822）、華夏滬深300（3188），噚日只係升咗1%左右，樂觀假設中資股升勢未完，呢幾隻ETF遲早落鑊，加上部份更較NAV出現折讓，隨時可以賺埋折讓轉溢價嗰浸，戰友不妨留意。
個股方面，可留意從事展覽及項目市場推廣服務嘅筆克遠東（752），截至今年4月底止，中期盈利9,354萬元，按年微升0.7%，由於大型國際性活動如奧運會、世博會及世界盃等，都喺雙數年舉行，故盈利增長縱輕微，但都算係交足功課。自8月見頂後，累積跌幅達14%，嚴重跑輸大市，現價市盈率12倍，股息率逾四厘，投資價值重現。同業新股Mega Expo（1360）招股反應佳，筆克挾着影子股概念，日線圖連續兩日出現陽燭，相信反彈之旅剛開始。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange