網遊股IPO一隻接一隻，今日到博雅（434）招股。身邊唔少朋友都提出疑問，世上免費game咁多，邊有人畀錢玩㗎？
會問呢類問題嘅朋友，絕對係理性消費者；但世上唔理性嘅人亦都大把。菲菲有朋友，最近經常玩隻足球經理人game，佢樂此不疲係咁抽球員。當菲菲笑佢毒時，佢就話：「一個七星球員可以賣到700元現金，毒啲都抵啦。」佢仲話識人用咗12萬港紙去買一支最強球隊番嚟，所以相信用大筆現金玩game嘅人大把。
所以只要間公司，整到一隻令人上癮嘅game，就可以sure win。至於博雅出嘅鬥地主，菲菲個保險agent曾經係資深玩家，更親眼見過佢同一大班同事食飯時，一坐低就全枱人一齊玩嘅盛況，可想而知，隻game的確幾成功。
博雅旗下遊戲都係博彩性質，所以有一定吸金力，單係上半年就賺1.04億人仔。招股價相對2014年預測PE為10倍至12倍，比起雲遊（484）及IGG（8002）唔算貴。
當然博雅嘅game好易俾人抄，騰訊（700）亦已出咗鬥地主，𠵱家更係內地App store排名第二。
不過喺抽新股階段同人講呢類風險，似乎又係認真便輸了。如果你信科網仲有得炒，一抽又何妨呢？
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange