昨日個市好似一個詐死的病人，突然彈起身嚇人一樣，驚嚇程度達到十級，上午仲死頂住百幾點升幅，下午魏力出外工作，冇睇個市個半鐘，收市一望竟然挾到400幾點！相信戰友都會問：究竟個病人係迴光反照定真係好番？
高人指點，11月期指轉倉位大致在22700至22800點水平，昨日一挾，好友已手握500點利潤，但23500至23800點為蟹貨集中營，短期不易衝破。板塊方面，濠賭股一馬當先帶出，科網股就要睇埋facebook業績，環保就炒三中全會國策，暫為三大重點關注行業。呢幾日減持了，是否要追番貨？魏力覺得要睇埋今明兩日，如確認出現入貨訊號，會盡快於fb匯報，敬請留意！
個股方面，乾隆科技（1236）控股權易手的交易完成，維持上市地位，狂炒注資概念。河北省供銷合作社入主呢隻殼，究竟有何搞作？買家為省政府機構，負責農業及社會發展，去年銷售868.9億人仔，利潤3.87億，意味乾隆科技將變身為窗口公司，炒作概念較一般內房借殼上市更大。再者，目前市值僅6.5億銀，你話PE幾低？
最後提一提思捷環球（330），該集團再挖走Zara母公司高層做設計總裁，至今已撬走Zara至少5名高層，走快速時裝的取態明顯，方向行對了，至少市場有憧憬，配合股價蓄勢突破橫行區，可以一試。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange