「祝你長命百歲！」可以係祝福，但亦可以係詛咒。估唔到葡萄牙球星基斯坦奴朗拿度（C朗）十足古惑仔，識得用呢句說話，嚟「兇」話佢喺球場上扮大佬同埋姿整嘅國際足協會長白禮達。
現年77歲嘅國際足協會長白禮達日前喺牛津大學演講時，無嗱嗱發神經，狂寸效力皇家馬德里嘅C朗。白禮達笑住同埋做出葡萄牙行軍嘅動作咁講：「佢就好似係球場上嘅總司令。」佢又話：「一個（C朗）喺髮型上花咗好多錢，另一個就冇，但其實冇乜所謂。我唔敢話邊個好啲，兩個（美斯及C朗）我都鍾意，但如要二揀一，我會揀美斯囉。」美斯同C朗都入選今年嘅金球獎。
皇馬喺禮拜二要求白禮達道歉，C朗亦不甘示弱，喺facebook寸番白禮達，C朗喺twitter咁樣回應：「呢段片清楚表明國際足協對我、我球會同我國家，有幾咁『尊重』同『照顧』，事實擺在眼前，解釋都無謂。我希望白禮達身體健康、長命百歲，而佢亦係值得嘅；咁樣佢就可以繼續見證佢喜歡嘅球隊同球員取得成功。」C朗咁講雖然好毒，有啲古惑仔feel，但先撩者賤、打死無怨，我求大俠認為白禮達差唔多成80歲，講嘢都唔經大腦，抵佢俾人咒囉！
知衰即時道歉
至於葡萄牙足總會長費蘭度高美斯亦批評白禮達：「當我睇到白達禮用咁嘅字眼嚟話我哋嘅國家隊隊長，實在感到好驚訝。我認為佢嘅言論，對C朗同埋葡萄牙都係好唔尊重。我哋已去信國際足協，要求佢哋就白禮達嘅言論解釋清楚。」皇馬教練安察洛堤則表示：「我覺得佢咁講好唔尊重C朗。我未同C朗傾番呢件事，但C朗每一日都好畀心機練習，係個好偉大嘅職業球員，值得獲得每個人嘅尊重。」
白禮達俾人狂插後都知衰，即刻出嚟補鑊，佢咁講：「我想講，C朗同美斯係同級。我好後悔自己嘅言論為大家帶來傷害，所以我就事件道歉。我從來冇意對皇馬、佢哋嘅球員或球迷，做一啲唔尊重嘅嘢。」
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24