「紅籌之父」梁伯韜（蕃薯梁）做刁嘅口味都幾多元化，又出人意表，早排賣走喜羊羊，轉頭打算走去買入台灣女星大S（徐熙媛）奶奶張蘭創辦嘅川菜連鎖店俏江南。蕃薯梁做慣大刁，一買一賣，睇落呢次應該係俏江南上市受阻，蕃薯梁想出手搞搞佢，遲吓伺機上市。
路透噚日報道，由梁伯韜打理嘅私募基金CVC近排同張蘭傾緊，出價3億美金（約23.4億港元）買起俏江南69%股權，即係話成個俏江南嘅估值約34億港元。如果傾得成，CVC就會成為俏江南大股東，張蘭持有31%。
俏江南上市屢碰壁
張蘭其實一早想將俏江南上市，可惜一波三折。原先佢計劃喺A股上市，但舊年初俾中國證監會拒絕，惟有轉戰香港，為咗來港上市，張蘭仲改埋國籍，落戶加勒比島國㖭。不過，張蘭今年中以市況差為由，暫緩上市計劃。
蕃薯梁成日喺內地傾生意，應該都有幫襯俏江南，可能見對方搞極都上唔到市，忍唔住出手。
蕃薯梁在公在私近年都做好多大刁，做親都係話題作，兩年前佢就利用私人投資嘅意馬國際（585），買入喜羊羊嘅品牌擁有者兼管理公司，上月先至賣走。
CVC之前就投資新秀麗（1910）、新鴻基公司（086），又向「魔童」王維基買入香港寬頻固網資產，𠵱家連食肆都搞埋。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange