揸住銅鑼灣SOGO的利福（1212），多年來由彤叔的周大福（1929）和細劉，透過合營公司（JV）共同持有，雙方各佔一半股份。自從彤叔退休，家族生意全面由純官揸旗後，利福情況就猶如一個幫會唔見咗精神領袖咁，有乜事嘅話，邊個壓場先？故市場自然心生疑問：利福未來的控制權，會唔會出現變化？直到前日呢個答案終於揭曉：大家先透過JV派貨，然後再由周大福沽番部份股份畀細劉，令周大福實質持有利福的權益跌至約25%，細劉就超過46%。
有芬佬朋友形容，利福長期以來街貨極少，有班人長年累月掃入利福後，就長放唔郁，收息之餘，亦是想等臨尾食鋪勁。如果純官和細劉的關係生變，雙方爭權甚至分手，是否有機會要觸發全購，進行私有化？事實上，曾經有一段時間，細劉在街外密密增持，連同周大福股權在內，距離全購界線的75%已不足1%差距。但日前雙方先分派、後沽貨做法，已確保大家可在不全購的情況下，有空間把股權逐步轉讓出去。私有化的憧憬，起碼短期內可以平息了。
不過長遠來講，那班等食糊的有心人，仍然是不會鳴金收兵。事關SOGO業權市值，在04年利福上市時僅以48億元入賬，𠵱家起碼值過百億啦！如果你相信SOGO終有一日要重建，咁同佢鬥長命，仍有道理嘅。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange