香港電視唔獲發牌仍未有轉機，有可能係港視最後一套劇集嘅《Night Shift》拍得如火如荼，前晚劇組如常開工，佢哋仲好齊心兼士氣高昂，盡心盡力希望順利完成。林嘉華、陳詩慧、沈穎婷同謝珊珊等噚日凌晨4點喺尖沙嘴一間桌球室拍攝，副導演張琦未知係咪見無綫劇成日穿崩，所以佢連陳詩慧拍攝時所戴嘅手錶都調校清楚，務必要連戲。
被裁副導怨政府
林嘉華講到發牌仍相當具信心，仲話：「因為唔發係於理不合，我唔捨得港視成班人嘅氣氛。」佢話下月6日立法會集會都會參與，覺得係公義問題，希望政府順應民意。同場嘅副導演張琦係被裁員工之一，佢直言政府將佢由憧憬嘅天堂打回人間：「𠵱家仲有幾多個王維基？佢甚至記得我個名，對我哋係帶住歉意同謝意，呢度係我哋嘅天堂。」佢自爆得知被裁後變得神不守舍，連呼吸都痛。
此外，冼灝英前晚就喺尖沙嘴街頭拍港視劇外景，對於TVB「愛回家」歡迎藝人回巢，佢就無意打電話話：「絕對唔會囉，我喺TVB九年，都會有我電話。」佢大讚王維基以前凌晨時分買定糖水探班，仲語帶相關話：「幾瘋狂，一個儍佬畀咁多嘢支持我哋，一般出面電視台畀罐頭大家食，係時候革新啦。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！