今年已經50有7嘅社民連主席長毛（梁國雄），周日去完佔中商討日，約埋立法會議員林大輝踢波，點知搞到甩骱兼骨折，𠵱家要瞓醫院。雖然佢痛到食止痛藥，但都咬實牙關話下周三（6號）一定返立法會投票，支持用特權法逼政府交出審批免費電視牌照嘅文件。
噚日八方去探長毛，佢前日朝早做完手術，鑲咗塊鋼片入腳後，精神尚算唔錯，仲話自己呢一、兩日就出得院；原來平日成日同佢「打情罵俏」嘅立法會主席曾鈺成，都發短訊慰問佢，問佢做乜變咗跛腳鴨？長毛好有自信咁話喎，今個禮拜都返得立法會㗎嘞，但八方都勸佢啱啱做完手術都係休息吓好啲，跟住仲展示醫生專登畀佢着嘅特製鞋，佢話隻鞋只要一充氣就有氣墊，加埋扶住枴杖，就實冇問題喎！當然，長毛最在意都係11.6用特權法查港視單嘢箒，強調點都會撐返立法會投票，希望建制派都順應民意。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange